கவிதை வரும் ..!

கவிதை வரும்


அழகாய்ச்சிறு குழந்தை

அருகமர்ந்து அன்பு காட்டி

ஐ லவ் யூ அங்கிள் என்றால்

ஆயிரமாய்க் கவிதை வரும்



காலையிளம் பரிதியைப்பார்

கடல் நீர் பார்; தென்னையிடை

பாளையிலே பனித்துளி பார்

பல நூறு கவிதை வரும்.



உழைக்கின்ற தோழர்கள்தம்

உடல் வியர்வை முத்தைப்பார்

களைப்பின்றிக் கழனி உழும்

கைகளைப்பார் ; கவிதை வரும்..!


குயில் பாட்டுப்பின்னொலிக்க

குலவையிட்டு வயல் நடுவே

மயில்தோகை விரித்திடவே

மழையெனவே கவிதை வரும்..!



இல்லத்தே ..கோயிலிலே

இருப்பதுவோ..இல்லையதோ

உள்ளத் துறைஇறைவன் உணர்

உடனடியாய்க்கவிதை வரும்..!



வாய்மொழியில் ..பயன்பாட்டில்..

வழக்கத்து உரை நடையில்..

தாய்மொழியின் சுவையுணர்த்து

தண்மழையாய்க் கவிதை வரும்..!